މިއަހަރުގެ ދެވަނަ ޓަރމުގައި ސެންޓަރ ފޯ ފައުންޑޭޝަން ސްޓަޑީސް (ސީ.އެފް.އެސް)އަށް އަލަށް ގުޅުނު ދަރިވަރުންނަށް އަމާޒުކޮއްގެން ބޭއްވުނު ”ތަރަހަ ވެލްކަމް ނައިޓް 2024“ ކާމިޔާބު ކަމާއެކު ނިންމާލައިފިއެވެ.
24 އޯގަސްޓް 2024 ވީ ހޮނިހިރު ދުވަހުގެ ރޭ އެފް.އީ ޕީ.އީ ހޯލުގައި ބޭއްވުނު މި ހަރަކާތުގައި ޖުމްލަ 70 އަށް ވުރެ ގިނަ ދަރިވަރުން ވަނީ ބައިވެރިވެފައެވެ.
މި ހަރަކާތް ފެށިގެން ދިޔައީ ތަރަހައިގެ ކުރީގެ އަދި މިހާރުގެ ހިންގާ ކޮމިޓީގެ ތަޢާރަފްވުމަކަށް ފަހުގައެވެ. މި ހަރަކާތުގައި ދަރިވަރުންގެ ޔޫނިއަންގެ ނައިބު ރައީސް އިތުރު ހަރަކާތް މިޝަލް މޫސާ، ނައިބު ރައީސް ޢިލްމީ ނާބިތު އަހްމަދު އަދި ނައިބު ރައީސް (ގޮފިތައް) ސައިފުالله މުސްލިމް ވަނީ ކުދިންނާ މުޚާތަބުކޮށް، ދަރިވަރުން ކިޔެވުމާ އެއްވަރަށް އިތުރު ހަރަކާތުގައިވެސް ޝާމިލުވެ އުޅުމަށް ނަސޭހަތްތެރިވެފައެވެ. މީގެ އިތުރުން ދަރިވަރުންގެ ޔޫނިއަންގެ ކުރީގެ ރައީސް އަރުޝަދު އަޝްރަފް ވެސް މި ހަރަކާތުގައި ބައިވެރިވިއެވެ.
މި ހަރަކާތުގައި ތަފާތު އެކި ކުޅިވަރުތައް ކުޅުމާއި، ދަރިވަރުންނަށް އެކަކު އަނެކަކު ދެނެގަނެ އުފާވެރި މާހައުލެއްގައި ގުޅުން ބަދަހިކޮށް، މަޖާކޮށްލާ އެކުވެރިކަން އާލާކުރުމުގެ ފުރުސަތު ވަނީ ފަހިކޮށްދެވިފައެވެ. މީގެ އިތުރުން އެމް.އެން.ޔޫ.އެސް.ޔޫ ބޮޑުބެރު ގުރޫޕްގެ ފަރާތުން ވެސް ވަނީ ހިތްގައިމު އައިޓަމެއް ހުށައަޅައިދީފައެވެ.
ތަރަހައިން ސިލްސިލާކޮށް ބާއްވަމުން އަންނަ މި ހަރަކާތުގެ މައިގަނޑު މަޤްސަދަކީ ސީ.އެފް.އެސް.އަށް އަލަށް ގުޅޭ ދަރިވަރުންނާއި ތަރަހައިގެ ހިންގާ ކޮމެޓީ ތައާރަފުވެ އެކުދިންނާއި ގުޅުން ބަދަހިކުރުމެވެ. އަދި ތަރަހައަކީ ދަރިވަރުންނަށްޓަކައި، ދަރިވަރުންނާއި އެކުގައި އަބަދުވެސް ތިބޭނެ ބައެއްކަމަށް އެކުދިންނަށް އަންގައިދިނުމެވެ.
ތަރަހަ ވެލްކަމް ނައިޓް މިހާ ކާމިޔާބު ކަމާއެކު ނިންމާލުމުގައި ތަރަހައިގެ އިސްވާރުންވަނީ އިސް ރޯލެއް އަދާކޮށްފައެވެ. ތަރަހައިގެ ހިންގާ ކޮމެޓީގެ ފަރާތުން ވަނީ މިކަން ފާހަގަކޮށް ހުރިހާ އިސްވާރުންނަށް ޝުކުރު އަދާކޮށްފައެވެ.
