އެމް.އެން.ޔޫ އެސް.ޔޫގެ ދޮންދީނި ގޮފިން ”ސްޓޫޑެންޓްސް ނައިޓް“ގެ ނަމުގައި ޙަރަކާތެއް ބާއްވައިފިއެވެ. މިއީ 2019 ވަނަ އަހަރު އެމް.އެން.ޔޫ.އެސް.ޔޫގެ ދޮންދީނި ގޮފީގެ ހިންގާ ކޮމިޓީއަށް އަލަށް މެމްބަރުން އައްޔަންކުރުމަށްފަހު އެކޮމިޓީއިން ކުރިޔަށް ގެންދިޔަ ފުރަތަމަ ޙަރަކާތެވެ.
24 އޭޕްރީލް 2019ވީ ބުދަދުވަހުގެރޭ އެމް.އެން.ޔޫ ހިތަދޫ ކެމްޕަހުގައި ކުރިޔަށްްދިޔަ މިޙަރަކާތުގައި އެކެމްޕަހުގެ 47 ދަރިވަރުން ވަނީ ބައިވެރިވެފައެވެ. އެމް.އެން.ޔޫ އެސް.ޔޫގެ ދޮންދީނި ގޮފިން އިސްނަގައިގެން ކުރިޔަށްގެންދިޔަ މި ޙަރަކާތުގައި އެމް.އެން.ޔޫ.އެސް.ޔޫގެ ދޮންދީނި ގޮފީގެ ހިންގާ ކޮމިޓީއަށް އަލަށް އައްޔަންކުރެވުނު 6 މެމްބަރުން (ރައީސް ޔާސްމީން އޮސްމަނަގިޗްް، ނައިބު ރައީސް – އިލްމީ އަޙުމަދު ރައްޔާން އިބްރާޙިމް، ނައިބު ރައީސް – އަމަލީ ތަހާނީ ތަސްނީމް، ޚަޒާންދާރު މާނިހު ސަލީމް، ސެކްރެޓަރީ ޝިނާ މުޙައްމަދު ޖުނެއިދުު، މީޑިއާ ކޯޑިނޭޓަ ފާޠިމަތު ޞަފާ އިބްރާޙިމް)ގެ އިތުރުން އެމް.އެން.ޔޫ ހިތަދޫ ކެމްޕަހުގެ ކެމްޕަސް މެނޭޖާރ އަދި އެެކެމްޕަހުގެެ ލެކްޗަރާއިން ވެސް ވަނީ ބައިވެރިވެފައެވެ.
މި ޙަރަކާތް ހުށަހަޅައިދެއްވާފައިވަނީ ރައީސާ ޔާސްމީން އޮސްމަނަގިޗްްި އާއި ނައިބު ރައީސް އިލްމީ އަޙުމަދު ރައްޔާން އިބްރާޙިމް އެވެ. މިގޮތުން، އެމް.އެން.ޔޫ ހިތަދޫ ކެމްޕަހާއި އަލަށް ގުޅުނު ދަރިވަރުންނަށް އަމާޒުކޮށް ކުރިއަށް ގެންދިޔަ މިޙަރަކާތްތަކުގެ ތެރޭގައި މުނިފޫހިފިލުވުމުގެ ގޮތުން ”ސްޕައިސީ ޗެލެންޖް“ ގެ ނަމުގައި ވަރަށް ފޯރިގަދަ ޗެލެންޖެއް ވަނީ ކުރިޔަށް ގެންގޮސްފައެވެ. ތިން ބަޔަކަށް ބަހާލައިގެން ކުރިޔަށް ގެންދިޔަ މި ”ސްޕައިސީ ޗެލެންޖް“ ގައި 6 ދަރިވަރުން ބައިވެރިވެފައިވާއިރުު މި ޗެލެންޖް ކާމިޔާބު ކޮށްފައިވަނީ އޭ.ސީ.އައި.ޓީ ކިޔަވަމުންދާ ދަރިވަރު މުޙައްމަދު ހަމީމް އެވެ. އެގޮތުން ޗެލެންޖް ކާމިޔާބު ކުރި މުޙައްމަދު ހަމީމާއި ހިތަދޫ ކެމްޕަސް މެނޭޖާރ ވަނީ އިނާމް ހަވާލުކޮށްދެއްވާފަައެވެ.
”ސްޓޫޑެންޓްުސް ނައިޓް“ގެ ނަމުގައި ބޭއްވުނު މިޙަރަކާތަކީ ހިތަދޫ ކެމަޕަހުގެ ދަރިވަރުންނާއި އެކެމްޕަހާއި އަލަށް ގުޅުނު ދަރިވަރުންނަށް އަމާޒުކޮށް އެމް.އެން.ޔޫ އެސްޔޫ އާއި އޮންނަ ގުޅުން ބަދަހި ކުރުމުގެ އިތުރުން އެމް.އެން.ޔޫ އެސްޔޫ އިން ހިންގާ ހަރަކާތްްތަކާ ބެހޭގޮތުން ދަރިވަރުންނަށް މަޢުލޫމާތު ފޯރުކޮށްދިނުމުގެ މަޤުސަދުގައި ބޭއްވުނު ހަރަކާތެކެވެ.
ލިޔުނީ: ސަފާ އަހްމަދު,
މީޑިއާ ކޯޑިނޭޓަރ، ދޮންދީނި، އެމް.އެން.ޔޫ.އެސް.ޔޫ
