ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް) ގެ ގޮފި، ސޮސައިޓީ ފޯ ހޮސްޕިޓާލިޓީ އެންޑް ޓޫރިޒަމް ސްޓަޑީޒް (ޝެޓްސް) އިން ރަމަޟާން މަހަށް ޚާއްޞަ ކޮށްގެން މުޅިން އައު އަދި ތާރީޚީ ޝޯ އެއް ގެނެސްދޭން ދަނީ ތައްޔާރު ވަމުންނެވެ.
”ޝެޓްސް ސުފުރާމަތިން 1442“ ގެ ނަމުގައި މި އަހަރުގެ ރަމަޟާން މަހު ގެނެސްދޭން ނިންމާފައިވާ މި ޝޯ އަކީ އެފް.އެޗް.ޓީ.އެސް އަށް ނިސްބަތްވާ ގިނަ ދަރިވަރުންތަކެއްގެ ހުނަރުތައް ފެނިގެންދާނެ ޝޯ އެކެވެ. މި ޝޯ ގެ މައިގަނޑު މަޤްސަދަކީ، ގޭގައި ފަސޭހައިން ތައްޔާރުކޮށްލެވޭނެ ފަދަ ތަފާތު ކެއުންތަކެއް ބެލުންތެރިންނާ ހިއްސާ ކުރުމެވެ. އަދި އެފް.އެޗް.ޓީ.އެސް ދަރިވަރުންގެ ހުނަރުތައް ދައްކާލުމާއެކު، އެ ދަރިވަރުންނަށް ހިތްވަރު ދިނުމާއި އެ ދަރިވަރުންގެ ނަފްސަށް އޮންނަ އިތުބާރު އިތުރު ކުރުމެވެ.
މި ޝޯގައި ހިމެނެނީ މައިގަނޑު 8 އެޕިސޯޑެވެ. އޭގެ ތެރެއިން 4 އެޕިސޯޑަކީ ތަފާތު 4 ވައްތަރެއްގެ ކެއުމެއް ތައްޔާރު ކުރާތަން ފެނިގެން ދާނޭ 4 އެޕިސޯޑަށްވާއިރު، މި އެޕިސޯޑުތައް ދެއްކުމަށް ހަމަޖެހިފައިވަނީ ރަމަޟާން މަހުގެ ކޮންމެ ހުކުރު ދުވަހެއްގެ ރެޔެވެ. ބާކީ 4 އެޕިސޯޑުން ފެނިގެން ދާނީ ތަފާތު ހަތަރު ބުއިމެއް ތައްޔާރު ކުރާ ތަން ކަމަށްވާއިރު، މި އެޕިސޯޑުތައް ދެއްކުމަށް ހަމަޖެހިފައިވަނީ ރަމަޟާން މަހުގެ ކޮންމެ ހޮނިހިރު ދުވަހެއްގެ ރެޔެވެ. މި ޝޯ ބެލުންތެރިންނާ ހަމައަށް ގެނެސްދޭނީ ޝެޓްސް ގެ ފޭސްބުކް ޕޭޖް މެދުވެރިކޮށެވެ.
ޝެޓްސްގެ އުއްމީދަކީ މުޅީން އަލަށް ތައާރަފް ކުރެވުނު މި ޝޯ އަކީ ކާމިޔާބު ހަރަކާތަކަށްވެ، ޝެޓްސްގެ ތާރީޚުގައި ފާހަގަކޮށްލެވޭ ފަދަ ހަރަކާތަކަށް ވެގެން ދިއުމެވެ. އަދި ސިލްސިލާ ގޮތެއްގައި ގެނެސްދެވޭ ޝޯ އަކަށް މި ޝޯ ވެގެން ދިއުމެވެ.
